Ўзбекистонлик футбол мухлислари милициянинг уларга қарши куч ишлатганидан норози
Футбол бўйича Ўзбекистон терма жамоаси ўйинларига чипта олувчиларни миршаблар дубинка билан калтаклаган.
18 март куни янги қуриб битказилган "Бунёдкор" стадиони чиптахоналарида Ўзбекистон – Ливан ўйинига чипта олиш учун турган одамларни милиция махсус кучлари калтаклаган ва айрим ишқибозларни ҳибсга олган.
26 март куни "Бунёдкор" стадионида бўлиб ўтиши керак бўладинган ўйинга чипталар 15 март куни чиқиши маълум қилинганди.
Аммо кейинчалик чипталарнинг 18 март куни сотувга чиқиши айтилди.
kun.uz веб саҳифаси душанба куни "Бунёдкор" стадиони кассаларида мухлислар оломони юзага келганни ҳақида ёзди.
Веб сайтнинг ёзишича, иккита чиптахона олдида 1,5 мингдан ортиқ мухлис йиғилиб қолган.
Маъмурлар йиғилганларга чипталарнинг қачон сотувга чиқарилиши ҳақида маълумот бермаган.
Ижтимоий тармоқларда ёзилишича, 17:40 чипта сотиш бошланган. Чипта олишга уринган оломонни милиция махсус кучлари резина тўқмоқлар билан калтаклаган.
Ижтимоий тармоқларда чипта сотиш воқеасини ўз бошидан кечирганлар мана бу каби изоҳларни қолдирган.
"Иккинчи секторга 20 минг сўмдан олдим. 1 киши учун 2 та билет беришди, паспорт сўрамади. Кассирга раҳмат, курткаларим йиртилганини, дубинкадан еганимни кўриб 6 та билет берди", - деб ёзади Бухородан келган мухлис uff.uz сайтига.
"Ҳозиргина келдим. Одам жудаям кўп эди. Афсус омма билан милиция орасида анча можаро юзага келди. Энди билет 20 мартданг кейин чиқаркан. Озмунча одам харид қилишга улгурди", - дейди яна бир мухлис.
Ўзбекистон Футбол федерацияси юзага келган тўполон ҳақида бирор изоҳ бермаган.
Федерация чипталар сотишга Терма жамоалар маркази шуғулланишини айтган.
ЎФФ Терма жамоалар маркази директори Асқар Толибжонов чипталар 18 март куни соат 14:00да сотувга чиқарилгани ва 6 мингта чипта ўша куни сотилгани ҳақида ҳисобот берган.
Аммо бунга мухлислар ижтимоий тармоқларда бу гапларни инкор қилувчи изоҳлар қолдиришган.
Мухлисларнинг ёзишича, ишдан жавоб олиб куни бўйи касса олдида кутишган, аммо натижада милиция томонидан калтакланиш бошланганидан кейин қуруқ қўл билан қайтишга мажбур бўлишган.
"Толибжонов ёлғон ҳам эви билан, 200 та сотилган бўлса ҳам катта гап. Қуруқ қайтишга мажбур бўлдик. Бизни жиноятчиларга ўхшаб калтаклашди ва спцназлар айримларни машанига тиқиб олиб кетди", - деб ёзади ғазабнок мухлислардан бири.
Чипта олишни истовчиларнинг ичида вилоятлардан келган ишқибозлар ҳам бўлган.
Чипта ололмаган бу мухлисларнинг айримлари қайтиб кетишга, айримлари эса Тошкентда қолиб эртаси кунни кутишга қарор қилган.
Аммо 19 март куни чипталар сотувга умуман чиқарилмаган. Чиптахоналарни ўраб турган милиция ходимлари келган мухлисларга байрам муносабати билан чипталар 22 мартдан бошлаб сотилишини айтишган.
Бу ҳақда 18 март куни ЎФФ бирор масъули мухлисларни огоҳлантирмаган. 19 март куни мухлислар стадиондан яна қуруқ қўл билан қайта бошлагандан кейин тушга келиб федерациянинг твиттердаги расмий аккаунти хабар тарқатган.
"Ўзбекистон - Ливан учрашувининг чипталари сотуви ТЖМ раҳбарияти буйруғига кўра 19 март куни вақтинчалик тўхтатилди", - дейилади хабарда.
Аммо "Бунёдкор" клубининг матбуот хизмати ўз твиттер аккаунтида чипталар байрам муносабати билан 22 мартгача сотилмаслигини билдирган.
"Байрам муносабати билан Ўзбекистон - Ливан учрашуви чипталари сотуви тўхтатилди. Жараён энди 22 мартдан бошлаб давом эттирилади", - дейилади хабарда.
2012 йилнинг сентябр ойида очилган 34 минг мухлисни сиғдира оладиган "Бунёдкор" стадионида илк расмий ўйин 26 март куни айнан Ўзбекистон – Ливан ўртасида бўлиб ўтиши керак.
Мутасаддилар 28 мингдан кўпроқ чиптани сотувга чиқарганини маълум қилишган.
Ўзбекистон терма жамоаси 5 ўйинда 8 очко жамғарган ҳолда гуруҳда биринчи ўринда кетмоқда.
Гуруҳда биринчи ва иккинчи ўринни эгаллаган жамоалар 2014 йил Бразилияда бўлиб ўтадиган Жаҳон чемпионатига тўғридан тўғри йўлланмани қўлга киритади.
